Nuranə Payızova: Ali məktəb başqa aləmdir,orta məktəbsə  həyatımın mayasıdır.

– Elin sözü əvvəl-axır düz olur,- kimi  maraqlı bir deyimi hamımız çox eşitmişik. Elə  “niyyətin hara, mənzilin  ora” kimi müdrik kəlamı da eləcə. Və bu müdrik kəlamlar  əsrlərin süzgəcindən nəsil-nəsil yaddaşlara höpmaqla  həyatımızı düzgün nizamlamaqda  bizlər üçün mayak rolunu oynayıb, bizləri həyata düzgün  istiqamətləndirib. Bu qüvvə bizi  daim yanılmaqdan qoruyub, çaşqınlıqdan hifz edib ki, yaşımızın ixtiyar çağında  geriyə boylanaraq ,-gəncliyimi geri qaytaraydılar,- kimi  bəsit ifadələrlə özümüzü aldatmayaq. Yüzlərlə misal sadalamaq olar ki, bir kimsə sevmədiyi, ürəkdən bağlı olmadığı peşəyə yiyələnməyə can atıb, ancaq   buna nail ola bilməyib.Bu məqamı da  ata-babalarımız unutmayıb , “daldan atılan daş topuğa dəyər” və sair kimi çoxlu sayda müdrik  zərb məsələləri ilə  bizi ayıq-sayıq olmağa ruhlandırıb,ürəkdən sevdiyimiz peşələrə yiyələnməyi tövsiyə edib. Bütün yaradıcılığı fəlsəfi məzmun kəsb edən  mərhum düha sahibimiz- xalq şairi Bəxtiyar Vahabzadə  isə “ Yaşamaq yanmaqdır, yanasan gərək, həyatın mənası  yalnız  ondadır…” deyib. Çox haqlı da deyib. Çünki insan hədsiz sevgi və məhəbbətlə çalışmadığı sahədə heç bir uğura imza ata bilməz. Və bütün bunların əzəli, əvvəli orta məktəbdən,hələ  erkən yaşlarında təhsilə, elmə münasibətdən başlayır.Məktəbli  gəlcəkdə hansı peşənin sahibi ola biləcəyini vaxtında düzgün müəyyənləşdirməlidir ki,  sonrakı peşmançılığa düçür olmasın. Və bu yazıda öz hədəfini düzgün seçərək öz arzusuna qovuşan belə gənclərdən biri  haqqında ürəkdolusu söhbət  açacağıq. O gənc isə Bakı Dövlət Universitetinin mexanika -riyaziyyat fakültəsinin I kurs tələbəsi Nuranə Payızovadır.

Nuranə Payızova 2005 –ci ildə Masallıda anadan olub. Sumqayıtdakı 5 nömrəli tam orta məktəbi bitirib. Tədris illərində müxtəlif tədbirlərə,o cümlədən bilik yarışmalarına qatılıb. Bu il keçirilən qəbul imtahanlarında 677,1 bal toplayaraq Bakı Dövlət Universitetinin mexanika- riyaziyyat fakültəsinin tələbəsi adını qazanıb. Söhbət zamanı  həmin anları xatırlayarkən Nuranə  bu gün də öz həyəcanını gizlədə bilmirdi. Dedi ki, doğrudan da bu cür məsuliyyətli  imtahanda  677,1 bal toplamaq asan iş deyil. Bu balı qazanmaq üçün ilk öncə bilikli olmalısan, bilikli olmaq üçünsə  əzmlə çalışmalısan.  Hələ yeniyetməlik çağlarımda məndə  riyaziyyat müəllimi olmaq arzusu çaş qaldırmışdı.Ümumiyyətlə bu hənnə həmişə  böyük maraım olub. Riyaziyyat bütün elmlərin açarıdır. Bütün fənləri yaxşı oxumağımla  bərabərriyaziyyatla bağlı keçirilən bütün bilik yarışmalarına qatılmışam və uğur da qazanmışam.Ali məktəbi seçəndən sonra mən öz üzərimdə hədsiz dərəcədə çox işlədim, çoxlu mütaliə etdim. Dərslərimə daha çox vaxt ayırmağa çalışdım. Hətta istirahət vaxtlarımı da təxirə saldım. Riyaziyyat fənnindən  hazırlığa getməmişəm  müstəqil olaraq özüm  öz üzərimdə səylə çalışmışam. Özümə qarşı tələbkar olmuşam. Sınaq imtahanlarından da yüksək nəticə əldə  edirdim. Buna görə də  qəbul imtahanlarından  yüksək bal  toplayacağıma əmin idim. İnsan özünə güvənməlidir, ancaq bunun üçün də əsas olmalıdır.Yəni bu, boş-boşuna ola bilməz. Etiraf edirəm ki, imtahan çox məsuliyyətli bir prosesdir. Burada biliyini ortaya qoymalısan, azca həyəcanlanmaq xoşagəlməz nəticələr verə bilər.

İxtisas seçimində sərbəst idim, valideynlərimin və müəllimlərimin heç bir təsiri olmadı. Ən böyük arzum BDU-nun tələbəsi adını qazanmaq idi, onu da qazandım. Artıq bir aya yaxındır ki, dərslərimiz  başlayıb. Dünən şagird Nuranə  idim,bu günsə  tələbə Nuranə. Tədris ocağı, müəllimlər, tələbə yoldaşların, dərsliklər, ümumiyyətlə, tamam başqa bir aləmdəyəm. Yeni kollektivdə doğmalıq hiss edirəm. Qrup yoldaşlarımla elə ilk gündən dostlaşdıq. Qəbul imtahanlarından yüksək bal toplamağım burada da diqqətdən yayınmır. Müəllimlərim uğurlarımı çox dəyərləndirirlər. Bir sözlə, özümü burada orta məktəbdə olduğu qədər  rahat hiss edirəm. Amma bir gün olsun belə təhsil aldığım tam orta məktəbi, sevimli müəllimlərimi və şagird yoldaşlarımı , dostlarımı unutmuram. Ali məktəb başqa aləmdirsə, on bir il təhsil aldığın orta məktəb isə həyatımın mayasıdır.
Hamıdan əvvəl öz  sevincimi anamla bölüşdüm.Bu, mənim üçün çox önəmli idi. O qədər rahat oldum ki, sanki bütün dünyanı mənə bağışlamışdılar. Müəllim peşəsi şərəflidir, müqəddəsdir. Bütün dövrlərdə bu peşə sahiblərinin üzərinə böyük vəzifələr düşüb. İnsanlara bilik vermək, elm öyrətmək, onları həyata düzgün istiqamətləndirmək  kimi mühüm vəzifənin öhdəsindən gəlmək  olduqca şərəflidir. Yaxşı müəllim olmaq üçünsə  gərək savadlı, bacarıqlı, fitri istedad sahibi olasan.

Uğur sözünü tez-tez işlədirik və mən özüm də bu sualı  özümə  verirəm. -Görən mənim üçün uğur nədir,-düşünürəm və tez də cavabım hazır olur; Uğura gedən yolda məqsəd aydın olmalıdır. Onda onu həyata keçirmək də asan olar. Çalışqan olmaq lazımdır ki, uğur qazanasan. Yalnız özünü gördüyün sahədə uğur qazana bilərsən. 677,1 bal toplayıb Bakı Dövlət Universitetinə qəbul olmuşamsa demək bu, mənim uğurumdur.

İstirahət günlərini həmişə səbirsizliklə gözləyirəm. Rəfiqələrim də mənim kimi düşünürlər. Çünki həftənin qalan günləri həddindən artıq gərgin olur  Dənizkənarı Parkda gəzməyi, sakitliyi  çox xoşlayıram. Arzum  gələcəkdə  magistraturada təhsili almaq, tədrislə bağlı kurslar açmaq, şagirdlərimə riyaziyyat fənnini sevdirməkdir.Müəllim üçün bundan böyük  hansı arzu ola bilər?!
Sifai SƏFƏROVA